رجع ليها
مكنش سابها علشانى
ولما سابته رمى نفسه فى أحضانى
وأحضانى كانت واسعة
فى عز البرد ليه دافية
فى قلب الوحدة بتسليه
ويوم فجأة
صحيت ولقيتنى بردانة
دا ساب حضنى
ورجع ليها
وكنت أنا إيه
محاولة إنه ينساها
وسيلة يقول انا عايش
وليا قلب من غيرها
تعيش ياقلبى وتاخد غيرها
وبالساهل
يشد خط من بعدى ..وينسانى
وفوق الخط خلاص مسحه..وخلانى
وانا اللى فى يوم اشترى فرحه بأحزانى
ومش هابكى ولاهندم على اللى راح
عشان مكنش دا نصيبى ياقلبى ارتاح
وسيبك منه من الاخر كفايا جراح
مايستاهل
وبنحب اللى مش لينا
يقوم يبعد ويكوينا
ودمع العين يبكينا
نشوف فرحه ونفرح ليه
نشوف وحدتنا نتألم
ومنفكرش ندعى عليه
هندعيله
ينول اللى فى أحلامه
ينور ربنا لياليه
ويبعد عننا ذكراه
لازم ننساه وينسانا
ولو تانى بعد عنها ورجع لينا
هيرجع يلاقى صفحة مليانة
وملهوش مكان فيها
رجع ليها
ليست هناك تعليقات:
إرسال تعليق